Gal 1 | KhmKCB | STEP | ខ្ញុំ ប៉ូល ជា សាវក ដែល មិន មែនមក ពី មនុស្ស ឬ តាមរយៈ មនុស្ស ឡើយ គឺ តាមរយៈ ព្រះ យេស៊ូ គ្រិស្ត និង ព្រះជាម្ចាស់ ជាព្រះវរ បិតា ដែល បានប្រោស ព្រះ យេស៊ូ ឲ្យ មាន ព្រះជន្ម រស់ឡើងវិញ

Galatians 1

1 ខ្ញុំប៉ូលជាសាវកដែលមិនមែនមកពីមនុស្សឬតាមរយៈមនុស្សឡើយគឺតាមរយៈព្រះយេស៊ូគ្រិស្តនិងព្រះជាម្ចាស់ជាព្រះវរបិតាដែលបានប្រោសព្រះយេស៊ូឲ្យមានព្រះជន្មរស់ឡើងវិញ 2 ព្រមទាំងបងប្អូនទាំងអស់ដែលនៅជាមួយខ្ញុំជូនចំពោះក្រុមជំនុំទាំងឡាយនៅស្រុកកាឡាទី។ 3 សូមឲ្យព្រះជាម្ចាស់ជាព្រះវរបិតារបស់យើងនិងព្រះអម្ចាស់យេស៊ូគ្រិស្តប្រទានព្រះគុណនិងសេចក្ដីសុខសាន្តដល់អ្នករាល់គ្នា 4 គឺព្រះយេស៊ូគ្រិស្ដបានប្រគល់អង្គទ្រង់សម្រាប់បាបរបស់យើងដើម្បីសង្គ្រោះយើងឲ្យរួចពីលោកិយដ៏អាក្រក់នាបច្ចុប្បន្នស្របតាមបំណងរបស់ព្រះជាម្ចាស់ដែលជាព្រះវរបិតារបស់យើង 5 សូមឲ្យព្រះអង្គប្រកបដោយសិរីរុងរឿងរហូតអស់កល្បជានិច្ចអាម៉ែន។ 6 ខ្ញុំឆ្ងល់ណាស់ដែលអ្នករាល់គ្នាបែរចេញយ៉ាងឆាប់រហ័សពីព្រះអង្គដែលបានត្រាស់ហៅអ្នករាល់គ្នាមកក្នុងព្រះគុណរបស់ព្រះគ្រិស្ដដូច្នេះហើយទៅឯដំណឹងល្អផ្សេងទៀត 7 ដែលមិនមែនជាដំណឹងល្អមួយទៀតនោះទេគឺគ្រាន់តែមានមនុស្សមួយចំនួនបានធ្វើឲ្យអ្នករាល់គ្នាជ្រួលច្របល់ហើយចង់បង្ខូចដំណឹងល្អរបស់ព្រះគ្រិស្ដប៉ុណ្ណោះ។ 8 ប៉ុន្ដែទោះបីយើងក៏ដោយឬទេវតាមកពីស្ថានសួគ៌ក៏ដោយឲ្យតែប្រកាសដំណឹងល្អប្រាប់អ្នករាល់គ្នាខុសពីដំណឹងល្អដែលយើងបានប្រកាសប្រាប់អ្នករាល់គ្នាចូរឲ្យអ្នកនោះត្រូវបណ្ដាសាចុះ។ 9 ដូចដែលយើងបានប្រាប់រួចមកហើយតែឥឡូវនេះខ្ញុំសូមប្រាប់ម្ដងទៀតថាបើអ្នកណាប្រកាសដំណឹងល្អខុសពីដំណឹងល្អដែលអ្នករាល់គ្នាបានទទួលចូរឲ្យអ្នកនោះត្រូវបណ្ដាសាចុះ។ 10 ដ្បិតឥឡូវនេះតើខ្ញុំកំពុងបំពេញចិត្តមនុស្សឬព្រះជាម្ចាស់? តើខ្ញុំខិតខំផ្គាប់ចិត្តមនុស្សឬ? បើខ្ញុំនៅតែផ្គាប់ចិត្តមនុស្សនោះខ្ញុំមិនមែនជាបាវបម្រើរបស់ព្រះគ្រិស្ដទេ។ 11 បងប្អូនអើយ! ខ្ញុំសូមប្រាប់អ្នករាល់គ្នាឲ្យដឹងថាដំណឹងល្អដែលខ្ញុំបានប្រកាសប្រាប់នេះមិនមែនស្របតាមមនុស្សទេ 12 ដ្បិតខ្ញុំមិនបានទទួលដំណឹងល្អពីមនុស្សណាម្នាក់ហើយគ្មានអ្នកណាម្នាក់បង្រៀនខ្ញុំដែរផ្ទុយទៅវិញគឺតាមរយៈការបើកសំដែងពីព្រះយេស៊ូគ្រិស្ដ។ 13 អ្នករាល់គ្នាធ្លាប់ឮអំពីកិរិយារបស់ខ្ញុំកាលនៅក្នុងសាសនាយូដារួចមកហើយគឺខ្ញុំបានបៀតបៀនក្រុមជំនុំរបស់ព្រះជាម្ចាស់យ៉ាងខ្លាំងបំផុតទាំងបំផ្លាញក្រុមជំនុំទៀតផង។ 14 ខ្ញុំបានចម្រើនឡើងខាងឯសាសនាយូដាលើសជាងពួកអ្នកដែលមានអាយុស្រករខ្ញុំជាច្រើននៅក្នុងចំណោមជនរួមជាតិរបស់ខ្ញុំហើយកាត់តែប្ដូរផ្ដាច់ខ្លាំងបំផុតចំពោះទំនៀមទម្លាប់ដូនតារបស់ខ្ញុំ។ 15 ប៉ុន្តែពេលព្រះជាម្ចាស់ដែលបានញែកខ្ញុំទុកតាំងពីក្នុងផ្ទៃម្ដាយបានត្រាស់ហៅខ្ញុំតាមរយៈព្រះគុណរបស់ព្រះអង្គនិងបានសព្វព្រះហឫទ័យ 16 បើកសំដែងឲ្យខ្ញុំបានឃើញព្រះរាជបុត្រារបស់ព្រះអង្គដើម្បីឲ្យខ្ញុំប្រកាសដំណឹងល្អអំពីព្រះរាជបុត្រានោះប្រាប់ពួកសាសន៍ដទៃហើយភ្លាមនោះខ្ញុំមិនបានប្រឹក្សាជាមួយមនុស្សណាឡើយ 17 ហើយខ្ញុំក៏មិនបានឡើងទៅឯពួកអ្នកដែលជាសាវកមុនខ្ញុំនៅក្រុងយេរូសាឡិមដែរគឺខ្ញុំបានចេញទៅស្រុកអារ៉ាប់ហើយត្រលប់មកឯក្រុងដាម៉ាស់វិញ។ 18 បីឆ្នាំក្រោយមកខ្ញុំបានឡើងទៅក្រុងយេរូសាឡិមដើម្បីស្គាល់លោកកេផាសហើយបានស្នាក់នៅជាមួយគាត់ដប់ប្រាំថ្ងៃ 19 ប៉ុន្តែខ្ញុំមិនបានជួបពួកសាវកឯទៀតទេលើកលែងតែលោកយ៉ាកុបជាប្អូនរបស់ព្រះអម្ចាស់ប៉ុណ្ណោះ។ 20 សេចក្ដីដែលខ្ញុំសរសេរមកអ្នករាល់គ្នានេះមើល៍នៅចំពោះព្រះជាម្ចាស់ខ្ញុំមិនកុហកទេ។ 21 ក្រោយមកខ្ញុំបានទៅឯតំបន់ទាំងឡាយនៅក្នុងស្រុកស៊ីរីនិងស្រុកគីលីគា 22 តែក្រុមជំនុំនៅក្នុងព្រះគ្រិស្ដដែលនៅស្រុកយូដាមិនបានស្គាល់មុខខ្ញុំឡើយ 23 គេគ្រាន់តែឮថាម្នាក់ដែលបានបៀតបៀនយើងពីមុនឥឡូវនេះកំពុងប្រកាសអំពីជំនឿដែលគាត់បំផ្លាញពីមុននោះវិញ 24 ហើយពួកគេក៏សរសើរតម្កើងព្រះជាម្ចាស់ដោយព្រោះខ្ញុំ។